tvb.com

 
 
   
tvb.com
 

新屋嶺傳說嘅驚天大秘密……

無互聯網嘅年代,大家成日講:「謠言止於智者」。但自從人類開始被網絡操縱,呢句話,已不合時宜。喺網絡世界,謠言就好似一個剖開大動脈嘅傷口,不以九秒九速度實時止血,你會流血不止而死。

仲記唔記得新屋嶺?無論黃藍,無論你是否相信謠言,睇到「新屋嶺」三個字,你腦海都會浮現「輪奸」傳聞,心理學來講,已經係非常成功嘅洗腦行為。

打開Google,「新屋嶺」嘅解說係:「有傳出違反人權、淩辱、虐打或性侵被捕者等未經證實的傳聞,被大部分人士稱為恐怖囚室。」然後再詳列傳聞內容,至於呢個地處邊境嘅扣留中心,其實一直係用來扣押非法入境者嘅歷史及作用,卻半句未有提及。

無受害人、無case、只有傳說嘅輪奸故事,竟然可以成為全城甚至全世界印象,謠言嘅威力,實在不可小覷。網絡年代,無再話謠言止於智者、清者自清呢種話,水濁咗難清,畫黑咗難白,潑妳一桶紅油只需一秒,你要洗擦起碼要一星期,而且肯定不能幹凈如昔。

新屋嶺嘅「地獄囚室」卑繪影繪聲咁誣蔑咗將近一年,尋日喺一宗名不經傳嘅case中卻真相大白。舊年9月,建築工潘榕偉涉嫌以網名「金正恩」喺社交媒體煽惑他人包圍新屋嶺案件續審,控方尋日喺庭上播出被告與警方嘅會面錄像,爆出咗新屋嶺傳說嘅驚天大秘密……

被告直認,佢喺社交媒體嘅帖文提到「有女示威者被輪奸」並非事實,寫呢啲純粹為「博出位」,他直言,睇到示威者被警察拘捕感到十分憤怒,於是用咗「輪奸」呢個「吸眼球」字眼,希望引起大眾對被捕者關註,希望能號召更多人包圍新屋嶺,務求令這設施停用。

其實佢本人並唔相信有人曾喺新屋嶺被打死,他更相信若真有強奸事件發生,一定會有警員阻止。但憤怒蒙蔽咗 他,於是他喺網上post咗虛構爆料嘅「黑警舊同學」,虛構咗性侵及輪奸,佢甚至直言:“打完第二日已唔記得自己有打過detail內容。”

一篇連作者自己寫完都唔記得寫過嘅帖文,竟成為反對派一年以來攻擊警方實牙實齒嘅「罪證」,天天將呢啲「罪證」掛喺嘴邊嘅,包括法律界人士、立法會議員、教育界、專業人士……

謠言真係會止於智者?回看當日中大校長段崇智聽完新屋嶺哭泣故事後嘅悲天憫人,你仲相信,小城會有智者?一個地盤工散播嘅謠言,竟可以令一個世界級學者動容,謠言,先至係呢場暴動嘅最大殺傷力武器。

謠言總係動人動聽嘅,真相卻係枯燥乏味嘅,唔趁謠言植根之前將佢毀滅,幾有力嘅真相都係百辭莫辯。

發表於 Posted on: 2020-07-31 11:14

Chenwenpei
帖數 Posts: 138
回頂端 / Top