tvb.com

 
 
   
tvb.com
 

如果,呢係一段愛情

呢幾日,我個腦一直浮現周星馳「大話西遊」入邊一段經典對白,係至尊寶為咗救紫霞仙子,決定戴上金剛箍忘記七情六欲變成孫悟空前嘅一番感悟:「曾經有一份真摯嘅愛情擺喺我面前我無珍惜,等我失去嘅時候才後悔莫及,塵世間最痛苦嘅事莫過於此。如果上天能給我一個機會再來一次,我會對嗰個女仔講三個字:我愛妳,如果非要喺呢份愛上加上一個期限,我希望是:一萬年。」

是否有啲共鳴感覺呢?如果我將對白改下,大家就心領神會……

「曾經有一份真正嘅自由擺喺反對派面前佢哋沒珍惜,等到失去嘅時候才後悔莫及,塵世間最痛苦嘅事莫過於此。如果上天能給反對派一個機會再來一次,佢哋會對中央講三個字:23條……」

嗰日,聽到港大法律學者張達明喺香港電臺大放厥詞:「中央已經沒咗耐性,直接代香港立法,佢哋放棄23條,即係放棄基本法,等於一國一制了。」咦,原來你哋想要23條?

明明係你哋反23條在先,你哋唔中意,咁國家就改用國安法,依家你哋又話強立國安法係不顧23條、放棄基本法,咁到底你哋係討厭國安法?定係想要23條?舉個例,你武器有老鼠窿,我卑你一塊石頭塞住個洞,你話不要,於是我攞水泥幫你封咗個窿,你返轉頭鬧我:「點解唔用石頭封」

我又唸起,「大話西遊」入邊羅家英飾演嘅唐三藏呢句經典對白:「悟空,你想要啊?你想要就講嘛,你唔出聲我點知你想要呢?雖然你好有誠意咁望住我,但你都係要同我講你想要架,你真是想要?咁好喇,你攞去喇……」

23年了,張達明「中央已無耐性」,嚇?無耐性唔會等你23年,無耐性唔會卑你哋鬧佢23年而粒聲唔出,無耐性就唔會眼白白睇住你哋打爛佢最珍視嘅東方明珠仍按兵不動。如果呢係一段愛情,23年已等到人老珠黃,係死心嘅時候了。

張達明又話「香港嘅刑事法判得好重,你睇今日有乜嘢香港人做嘅事有邊啲係香港法律阻止唔到嘅?點解偏唔會行一條本地立法嘅路,而要中央直接頒布國安法」

咁我就問下呢位港大法律學者:請問今日香港哪條法律可阻止李柱銘黎智英陳方安生郭榮鏗莫乃光黃之鋒去美國通番賣國?請問邊條法律可以禁止暴徒攞住他國國旗喺我哋嘅國土大嗌「香港毒立」?請問邊條法律可以懲治嗰啲將外國黑金漂白成眾籌捐款嘅暴動操控者?……
天作孽猶可恕,自作孽不可活。廣東人有句老話:「敬酒唔飲飲罰酒」,今次喺反對派身上完全應驗。

時辰到了,萬眾期待嘅國安法即將降臨,呢幾天,香港人真係忽然有種光復香港嘅感覺。

發表於 Posted on: 2020-07-24 15:57

Chenwenpei
帖數 Posts: 138
回頂端 / Top