tvb.com

 
 
tvb.com
 

希望J2增加日劇時段

吉成千奈美:

《為了N》已時隔一年多照例會播,咁快又再重播《雙面醫生》,有可能《為了N》套劇搵唔到贊助商亦有可能唔播...《為了N》這套劇集其實幾值得睇而且又拍得幾好,演員又演得唔錯!原來《夜行觀覽車》同《逆轉真相》係出自同一班製作人真係有佢哋拍攝風格!講《逆轉真相》係日本收視差,但拍得有水準而且演員又演得好始終都有觀眾欣賞,不過有好多師奶係唔鍾意睇呢類型劇集所以未收視唔好囉!而星期六日睇咗《小學餐女廚神》第三集同第四集,係星野光子前老闆真係度咄咄逼人好似同星野光子有仇,好想令星野光子係飲食界消失,但又唔會令星野光子氣餒,有D似<無價人生>咁屢敗屢戰好有鬥心,而且卡士好又有經驗好演員演出有保證,

<Crisis>都算係好落本拍,而且日本好少拍呢類動作劇集,成本真係一個問題唔拍唔出奇!而<寵物情人>就麻麻男女主角都係唔吸引反而有D男配角靚仔而且有D好熟面口,係星期六個集遇到個痴線佬幾搞笑,事實卡士超弱...唔知下一集又會唔會咁好笑啦!星期日播<恐怖醫學>無得係Viu TV網頁重溫以前記得<恐怖醫學>有重溫真唔明,反而本地綜藝節目同劇集一定有重溫...

講開就王維基真係已批准開HKTV有流動電視,但王維基好似無乜反應,更係啦而家先批真係遲咗D,到而家環境更係要諗諗或者諗下其他模式做電視!而奇妙電視台好似無佢啂台網頁我搵唔到,你知唔知!講真TVB將賽馬擺係J2台播係啱,應該係廣告費可以收貴D如果擺係明珠台播會平好多,就快又到賽馬開鑼!

發表於 Posted on: 2017-08-14 21:49

kolley
帖數 Posts: 7596
回頂端 / Top
回應:kolley

講真係J2平日深夜時段播日劇都唔會有廣告贊助,仲有《為了N》卡士唔差得過《最強名醫3》,照計係TVB唔想免費台播太多日劇,影響myTV Super上客,J2咁快重播《雙面醫生》,都係同日本10月開拍第二輯有關,宜家重播都係同日本電視台傾買第二輯安排,如無意外J2最快11月有得播。

你講到《為了N》咁值得睇,TVB唔係J2重播令觀眾欣賞唔到高質素劇集,作為大台的TVB完全無視社會責任。事實上《夜行觀覽車》,《為了N》同《逆轉真相》都係改篇湊佳苗作品,而這三套劇都係由同一製作班底製作,而我只係有睇《夜行觀覽車》同《逆轉真相》,感覺上這兩套日劇唔係傳統推理日劇,傳統推理日劇都係一兩集完一個故事,而這兩套日劇除了有推理,仲牽涉好多唔同事,好完整又有人性化。而《逆轉真相》係日本收視差,同日本播放模式有關,一星期播一集,故事連貫性太強,觀眾無睇一集就唔知發生咩事轉台唔睇,所以近年高收視日劇都係單元式查案醫療劇。

《小學餐女廚神》真係愈來愈好睇同有驚喜,星期六個集講星野光子煮同一味道俾小朋友同家長,努力鑽研試唔同蕃茄,終於煮出適合兩種唔同口味都讚好食,從中可以睇得出星野光子對美食執著,第四集星野決定開車仔檔賣法式全餐,前老闆見到即係告她,仲封殺她的食材,講真開車仔檔好似係<無價人生>都有,咁套劇卡士都係演技派演員。

<寵物情人>卡士弱,宜家當搞笑劇輕鬆笑下都唔錯,而下集男配角出場見女主角,應該會爆出唔少笑料。<恐怖醫學>有得係Viu網站重溫,係唔係你搵唔到所以話無得睇,不過宜家Viu TV愈來愈多自製節目,已經好少睇。

講開王維基做流動電視唔可以入屋,一入屋接收即違法,就梗係唔做,我估王維基等免費牌先做,其實傳統電視廣告市場收窄,製作本地電視節目係回唔到本,好似Viu TV同奇妙經營情況都蝕本,我收唔到奇妙電視,所以唔知奇妙節目表,另外TVB將本地賽馬放J2播無問題,但外國馬無收視同觀眾,廣告商唔會俾錢落廣告,仲影響J2六日晚節目編排,反正明珠台收視低,放外國馬落六日晚播對TVB經濟效益最大。

發表於 Posted on: 2017-08-16 22:44

吉成千奈美
帖數 Posts: 1720
回頂端 / Top
吉成千奈美:

多數都係myTV Super播放完先比係J2台播,J2台多數都唔係第一手播日劇,除非有贊助商某套日劇先係首播!你話《雙面醫生》會再拍第二輯,咁樣J2台播《雙面醫生2》好近貼日本。講回《為了N》真係唔係J2台播真係有D可惜而觀眾欣賞唔到。

至於《小學餐女廚神》真係幾好睇,劇情本來好普通但改編同有演技派可演出有追看性劇集,而下一集又有精彩演出....Viu TV<寵物情人>真係當搞笑劇輕鬆笑時段睇囉...我而家都好少睇Viu TV!

而J2台播放外國賽馬係幫馬會播放問佢哋兩間機構協議先知,始終外國賽馬亦有投注咁一定有人睇賽馬,又唔洗入場更加要電視台轉播賽事!講王維基都要開董事會再講!

發表於 Posted on: 2017-08-17 21:00

kolley
帖數 Posts: 7596
回頂端 / Top
回應:kolley

咁又唔可以話J2播放日劇全部都係重播myTV Super,始終myTV Super係網絡電視,唔可以播放尊尼藝人參演的日劇,今年J2首播日劇有《A LIFE:深愛的人》同《逆轉真相》都係受網絡電視版權限制,仲有《僱傭妻子》係myTV Super播過兩次都有廣告贊助,證明唔一定首播日劇先吸引到廣告商。《雙面醫生》係10月會播第二輯,不過唔知係唔係J2首播定myTV Super播先。J2宜家已經無新日劇時段,所以《為了N》係J2重播機會唔大,除非安排係星期六朝早重播。事實上TVB有好多日劇都無係免費台重播。

其實《小學餐女廚神》係原創劇本,唔可以話改編得好,係編劇將個普通寫得幽默有趣,故事搞笑得來有劇情言之有物,仲有每集集數斷開後又連貫到個故事延續,當然天海佑希將星野光子角色演繹得好好,仲有套劇都有唔少驚喜同之後意想不到的情節,係想令人追睇,不過可惜這套劇係日本收視好差,Viu TV播<寵物情人>都唔差,至少有得笑下,好過Viu TV自家出品堆悶劇,Viu TV愈來愈少日劇播,少睇都正常。

另外馬會係有要播放機構播放外國賽馬,但無指明電視台放係咩頻道,以前亞視播放星期三夜馬同外國馬都係放國際台,而TVB將賽馬放係J2,無非係想陰乾J2,迫觀眾轉睇翡翠台,宜家J5轉做財經台,星期六日都係重播節目,睇下TVB肯唔肯將外國馬轉去財經台播,順手穩定J2六日節目表。至於王維基開免費電視台都係無用,大部分觀眾轉晒網絡電視,況且本地節目點都唔夠外地節目鬥,投資製作成本都唔夠,最新消息係鳳凰都撤回免費電視牌照。

發表於 Posted on: 2017-08-19 17:52

吉成千奈美
帖數 Posts: 1720
回頂端 / Top
吉成千奈美:

《小學餐女廚神》越睇越好睇,劇情講到星野光子係學校相認返女兒高山晴子,而兩母女有好大誤會,而星野光子同荒木講出事實出嚟,然後荒木先生再講翻比晴子知,終於佢哋兩個亙相諒解。而星野美食車封油鴨又被前老闆篠田章吾攞咗做佢美食車主題棻色。星野真係重重難關都要捱過去.....

至於Viu TV播<寵物情人>同<恐怖醫學>都無睇,等得閒係Viu 網重溫,星期六日晚上8:30睇明珠台播<全美一叮>我不嬲追睇開,但今之有我哋香港小巨肺表演,仲有其他參賽者表演一樣好精彩,要睇晒應該要個多月先完,而且今次比已往係最緊貼2017第十二季,TVB應該購買會貴一D,近排係網上同fb都見到佢又係youtube有二千幾萬點擊率真係好紅,佢個樣都幾得意又可愛!

發表於 Posted on: 2017-08-30 22:08

kolley
帖數 Posts: 7596
回頂端 / Top
吉成千奈美:

噚晚睇完《小學餐女廚神》大結局,劇情講星野光子到最尾,都係好享受學生食得好開心真係令人興奮,而星野光子啟發前老闆對人生要開懷有自己創作食譜,而佢老闆雖然攞唔到三粒星,未期待下次再創造新鮮!又估唔到星野光子唔重返高級餐廳,星野光子認為係出面更有發揮更有有創意食譜!下星期六日播兩部日劇每晚各一集,星期六晚播<HELLO!刺蝟偵探>同星期日<緊急救命3>,而<HELLO!刺蝟偵探>由 瑛太、深田恭子 主演真係好小見瑛太演出,而<緊急救命3>有好多超星日本男女藝人主演有山下智久/新垣結衣/戶田惠梨香等好勁...都好緊貼日劇,最近TVB都好捨得買!

至於Viu TV播<寵物情人>已播兩集,我仲未翻睇,遲D先重睇,而家追睇緊<全美一叮>,已睇咗四集都未播放香港小巨肺唱,可能嚟緊星期六日播出香港小巨肺表演,噚晚星期日睇咗勁敵Angelica表演都好超班,上一回已禁咗黃金制大家都知,但係都好想睇譚芷昀(Celine)表演!

發表於 Posted on: 2017-09-04 17:26

kolley
帖數 Posts: 7596
回頂端 / Top
回應:kolley

昨晚已經睇完《小學餐女廚神》大結局,成套劇幾好睇同搞笑,其實啟發星野光子享受煮嘢食樂趣係小學餐班小朋友,正因為煮學生餐有好多限制,而星野光子從中明白以客人作對準,唔係之前係佢老闆間餐廳鍾意煮咩都得,而小朋友食完星野光子煮的學生餐讚好食個份滿足感,車仔檔令星野光子以有限食材煮出好味菜式,唔似以前堅持貴價食材,講到尾係佢老闆迫到星野光子入盡頭,先領悟道理,另一方面佢老闆對星野光子又愛又恨。而結局最令人驚喜係三葉小學有一星,保得住學校午餐,其實星野光子唔重返高級餐廳,係因為高級餐廳親近唔到客人,好難創造新菜式。至於老闆間餐廳攞到兩粒星,加埋三葉小學的一星,未三星。而阿晴妹妹去向有無咩交代。

另外J2日劇回復一星期播一集,證明去年改革日劇檔六日晚連續播放策略失敗,始終星期六同日晚播放時間唔相同,叫觀眾點就到時間睇。星期六晚播放<HELLO!刺蝟偵探>宜家係日本仲播緊,日本播放時間係播完<逆轉真相>時段後播出,可能係日本收視差,所以你唔知。瑛太近年少演出日劇,而J2無咩播過深田恭子演出日劇,唔知觀眾會唔會唔太熟悉。

J2首播<緊急救命3>都幾意外下,頭兩輯都唔係TVB買,而J2買第三輯播又唔重播頭兩輯,觀眾會唔會睇唔明,事實上我都無睇過頭兩輯,星期日晚睇都唔知會唔會重新交代角色,望就望係新故事。而<緊急救命3>係今季日劇收視冠軍,山下智久,新垣結衣,戶田惠梨香,比嘉愛未全部都係一線明星陣,好似仲加入新生代演員演出,都幾令人期待。

講真TVB捨得買日劇都要肯放免費台播先得,事實上自從TVB收費電視轉做網絡電視,好多有尊尼藝人演出的日劇都唔放得myTV Super播,先放J2首播,其實J2播<HELLO!刺蝟偵探>同<緊急救命3>都為買下季日劇做準備,J2播《小學餐女廚神》已經係富士日劇解禁,照咁睇TVB同富士有翻合作。

Viu TV播<寵物情人>都好睇,睇到澄麗鍾意同緊張momo,至於明珠台堆節目就無咩興趣睇,J2堆節目都睇唔切,除了日劇外,每星期仲要追睇<Music station>,<VS嵐>。Viu TV播放<恐怖醫學>同無線財經台播放健康節目<愈睇愈健康>都未追到進度,昨日睇到<最強名醫3>第五集,森山醫生有盲腸炎,俾實習醫生做手術一路哭勁搞笑,其實J2回復日劇一星期播一集,好大機會星期六日外國馬轉去無線財經台做。

發表於 Posted on: 2017-09-04 22:52

吉成千奈美
帖數 Posts: 1720
回頂端 / Top
吉成千奈美:

係J2台星期六睇咗<HELLO!刺蝟偵探>兩集只覺得一般無驚喜,而深田恭子演出都係一般,反而瑛太演出比較落力,其他演員算OK男女演員又唔係好省鏡,聽講係日本收視唔得,不過我都會繼續追睇!至於星期日播<緊急救命3>又睇咗兩集暫時都幾好睇,不過前兩輯都未睇,比較就難追上劇情,唔知你有無睇過前兩輯,而<緊急救命3>卡士比較強勁,仲有好多男女新星一齊演出!好似山P演繹做醫生其實唔係咁有說服力,只係俊男美女搭够,但係今季收視冠,可能最近無乜劇集對手,好似會拍電影版多數香港都會上央!

而Viu TV播<寵物情人>我就無追睇,要抽時間係網上重溫睇同恐怖醫學,你有追睇<最強名醫3>真係幾好睇又搞笑,而<Music station>成日唔記得睇,只係安排時間唔好啦好容易過咗!而家J2台回復播日劇時間真係幾好,觀眾可以自己安排時睇!

發表於 Posted on: 2017-09-23 18:03

kolley
帖數 Posts: 7596
回頂端 / Top
回應:kolley

J2播兩套日劇我都有追,先講<HELLO!刺蝟偵探>,套劇唔係走傳統推理偵探劇,好明顯似搞笑劇,正如套劇一開頭主角讀白一樣,每集包括有感人,友情,靈異唔同原素的故事,深田恭子係第二集先正式出場,戲份唔多,瑛太係主角,戲份最大易入戲,相對上其他角色發揮機會唔大,而瑛太拍檔V6的森田剛都算多戲份,其實當純搞笑劇唔錯,好似第一集扮電視台搵童星,第一位出場女童星自我介紹,鍾意廣瀨玲,新垣結衣同桐谷美玲,鍾意劇集<僱傭妻子>同<刑偵相棒>,仲唱歌,令人深刻,當然最好笑係有個肥妹背住書包,搞到主角自己走埋人。套劇唔係走傳統推理路線,係日本未唔收得,仲有唔收得都唔代表唔好睇。

<緊急救命3>暫時睇了兩集都幾好睇,我本身無睇過前兩輯,就當新故事追。其實無睇前兩輯唔知人物關係,所以唯有靠對白估,套劇唔係一般醫療劇故事只發生係醫院,要坐直升機去現場,所以比起一般醫療劇新鮮,第三輯主要故事講藍澤白石緋山訓練新人,而<緊急救命3>卡士勁唔知係唔弱點,搞到主角戲份好似都無咩,反而新人仲多戲份,上集講父母不知子女心,實際上仔女都唔知父母心都幾貼題,正如藍澤白石訓練新人方法唔同,目的都係想教好新人。事實上前兩輯山P仲係實習醫生,況且山P都30,以他咁的年紀做醫生都正常,可能他個樣生得太年輕,<緊急救命3>高收係前兩輯收得,況且套劇集合山下智久,新垣結衣,戶田惠莉香星級演員助陣,有咩可能唔高收。

今季日劇收視基本上得<緊急救命3>跑出,情況有如<女醫神Doctor X>系列,系列劇比一般日劇收視高係正常,而電視台趁宜家高收拍電影版,代表拍第四輯機會唔大。其實<緊急救命3>預告係J2頻頻有,證明TVB幾重視這套劇,下星期五晚9:00仲播埋《注意!「嵐」色警報!》,由一眾<緊急救命3>演員上《VS嵐》玩遊戲。

發表於 Posted on: 2017-09-24 2:26

吉成千奈美
帖數 Posts: 1720
回頂端 / Top
另外Viu TV播<寵物情人>上網睇有無期限,今晚個集睇了,計埋上星期個集,劇情都無咩突破,恐怖醫學播埋下個月尾做完,唔知之後播咩。<最強名醫3>暫時睇到第6集,森山放低尊嚴向相良請教做手術,唔知TVB錄影時間出錯搞到睇唔晒最後,<Music station>一係星期六朝早9:00播,重播係凌晨2:35先做,唔錄影根本睇唔到。<VS嵐>集集追,每集都有唔同笑料,今集嘉賓太郎隊,唔知你有無睇。J2星期六晚播放日劇時段太夜,如果早半個鐘播會好好多,仲有重播時間係凌晨唔係太好。其實奇妙電視係10月8日晚10:30-11:30都有日劇播。不過係播朝日刑事劇咁解。

發表於 Posted on: 2017-09-24 2:26

吉成千奈美
帖數 Posts: 1720
回頂端 / Top
吉成千奈美:

<HELLO!刺蝟偵探>睇到第三集,睇落去好似有D推理又帶D搞笑情節,始終劇情同卡士比較弱D,睇過幾集拍攝手法無乜特別,而你講森田剛真係唔認得佢,佢個樣殘咗好多望落佢好似比年齡實際大好多,另一個新星廣瀨玲真係唔識,最認識係新垣結衣同桐谷美玲等等!

而<緊急救命3>睇咗三集我覺得都幾好睇,可當新劇睇,點解TVB又唔買前兩輯<緊急救命1,2>到播第三輯未好啦!你話TVB咁重視<緊急救命3>咁又購買前<緊急救命1,2>兩輯,可能估唔到咁收得又有第三輯,係星期五明晚9:00播《VS嵐》係宣傳<緊急救命3>套集,睇嚟購買<緊急救命3>都唔平,所以未谷行廣告!

Viu TV播<寵物情人>要抽時間睇,今個星期日播最後一集恐怖醫學咁下星期日又播咩綜合節目,Viu TV播都好鍾意播大陸劇集同綜藝節目,睇嚟好快唔睇Viu TV,至於<Music station>真係追睇唔到時間唔啱而家又無重溫節目,而家如要重溫節目就要租myTV Super比月費!奇妙電視有日劇播朝日刑事劇有問咩,咁有無係網上重溫睇奇妙電視節目,只有直播 (試播)仲未有重溫節目服務要追睇日劇比較麻D,如要睇跟時間或錄影重睇!

發表於 Posted on: 2017-09-28 16:56

kolley
帖數 Posts: 7596
回頂端 / Top
回應:kolley

講真我都仲未睇到<HELLO!刺蝟偵探>第三集,等10月長假一次過睇兩集,其實本身<HELLO!刺蝟偵探>係漫畫改篇,劇情弱都係原作問題,況且這套劇又唔係抄傳統推理劇路線,想走搞笑溫情風格,仲有聽其他討論區網友話套劇過了三集後會好睇返,卡士唔算弱,起碼有瑛太,深田恭子,遲下仲有蒼井優,森田剛拍日劇唔多,老了好多就唔知,不過他之前有上《VS嵐》做嘉賓,TVB無播過廣瀨玲演出的日劇,所以未唔識,新垣結衣同桐谷美玲演出的日劇之前係J2播唔少。

<緊急救命3>其實真係幾好睇,不過有睇過頭兩輯的劇迷對第三輯評價好差,而TVB無買<緊急救命1,2>係之前買手失當,<緊急救命>第一輯係日本播放時間係2008年,香港係2009年由有線購入版權,至於第二輯係2010年日本播放,香港係2011年由Now101台播放,TVB係2010年前購買日劇都唔會買醫療,刑事個類劇,可能覺得香港無市場,仲有當時收費台播日劇根本唔多,所以TVB未放棄唔買<緊急救命>。而TVB今年買翻<緊急救命3>都係睇卡士,山下智久,新垣結衣,戶田惠莉香同場演出,真係吸引到觀眾,況且係日本收視唔錯,未後知後覺買返,講真TVB仲要俾錢買多集兩個月前日本播放的《VS嵐》,真係想谷<緊急救命3>,始終套劇有卡士有話題,唔谷這套唔通谷<HELLO!刺蝟偵探>,想谷都谷唔起,<緊急救命3>係日本上星期先結局,而這套劇暫時係富士2017年月九平均收視有雙位數的劇,認真勵害。

<寵物情人>其實一次過睇仲好睇,宜家一星期一集播得太慢,恐怖醫學都仲未播完,播到10月先大結局,不過之後播完做咩節目完全無公佈。反而播完<寵物情人>後會播武井咲主演的夏季日劇<黑色筆記本>,Viu TV點知得大陸劇同綜藝節目趕客,遲下仲播埋重口味泰劇,真係想迫你轉台。搞搞下宜家奇妙仲好過Viu TV,真係唔明Viu TV班高層做咩。

發表於 Posted on: 2017-09-29 2:51

吉成千奈美
帖數 Posts: 1720
回頂端 / Top
<Music station>以前係J2星期六晚凌晨12:00/12:30播放,係2015年J2接手賽馬,搞到<Music station>遲播,事實上J2同馬會簽了3年轉播協議,即係播埋下年就完約,只要TVB唔同同馬會續約,J2就唔細再播賽馬同六合彩,Viu TV可能會肯接手賽馬,始終英文台無嘢播,播賽馬攝時間有廣告都算唔錯。

仲有myTV Super得日劇有重溫,其他日本綜藝節目都唔會有重溫,就算收錢myTV Super都唔例外,奇妙電視係星期日晚10:30-11:30播朝日刑事劇,罷明同J2打對台,到時Viu TV收視仲差,而網上重溫睇奇妙電視節目好似裝有線先有,仲有奇妙電視星期一朝早都會重播多次,即係叫你錄影或即時睇,我無奇妙所以同我關係唔大。

發表於 Posted on: 2017-09-29 2:52

吉成千奈美
帖數 Posts: 1720
回頂端 / Top
吉成千奈美:

係星六晚睇咗<HELLO!刺蝟偵探>第四集真係開始覺得過癮又幾好睇,真係好鬼怪係漫畫改編情節,今集有蒼井優我幾鍾意佢演出,而蒼井優演技好又有氣質,開始對<HELLO!刺蝟偵探>好有興趣追睇!上星期日停播<緊急救命3>又要下星期日播先有得睇,你話2009年有線同2011Now101台播放<緊急救命1,2>,而TVB買手失當點樣失當價錢....

至於<寵物情人>一次過睇幾集會好睇D,咁未劇情節奏慢拍攝手法又唔係好特別,男女主角又唔係靚又無氣質已經無追睇性張力,之後會播武井咲主演的夏季日劇<黑色筆記本>,聽個劇名好似好吸引想睇,多數會追睇!

遲D唔會唔係Viu TV直播賽馬,如果係咁J2台會唔會播多D日劇同綜藝節目....

發表於 Posted on: 2017-10-03 18:12

kolley
帖數 Posts: 7596
回頂端 / Top
回應:kolley

上星期長假已經連睇<HELLO!刺蝟偵探>兩集,上星期六個集劇情弱d,成集大部分情節都係打鬥追逐戲,而結局又無交代成件事真相就完,前兩集主要作用似係為四俵蘭子出場。第四集講間屋鬧鬼幾過癮,每次都係得細路女一個先有鬼出現,請埋兒童心理學家話細路女心理作用做出相應行為,點知個兒童心理學家都俾鬼整到周身傷,蒼井優做靈媒有幾似,而個細路女好似俾阿媽打傷,似乎有不為人知的秘密,其實瑛太同蒼井優係四年前拍<年輕人們>合作過,一早都話<HELLO!刺蝟偵探>唔係一般走推理劇路線,所以劇情唔係大路,咁好睇未記住準時追睇。

上星期日J2全日都播馬未停播,今個星期日會有得做,所以上星期五J2未播《注意!「嵐」色警報!》補數,個集未有齊<緊急救命3>演員玩遊戲,大談拍攝感受,咩你無睇咩。TVB係2009年點會無錢買<緊急救命>,係TVB買手買劇喜好問題,2009年買日劇買同屬富士電視台製作的<純愛>同<窮人x愛麗絲>都無要<緊急救命>,好明顯TVB對醫療日劇係免費電視台播出收視無信心而放棄,相反有線收費台無咁多考慮,至於第二輯唔買明顯係之前無買第一輯,J2播第三輯就認真奇怪。

<寵物情人>唔好當日劇睇,始終<寵物情人>主要外銷亞洲市場,所以劇情節奏都唔係日本人口味,見日本免費台都係放係深夜播就知,<寵物情人>係愛情劇,有咁多kiss景頭好明顯吸納年輕女性觀眾。不過下星期六又停播,真係唔明Viu TV節目安排做咩。男女主角卡士本身弱真係難吸引觀眾,講真我都唔明Viu TV點解要首播這套而唔走去播桐谷美玲主演的<人100%靠外表>。<黑色筆記本>最快都要等到12月先上得,係推理查案劇,之前睇music station介紹武井咲做女陪酒查案,好唔好睇就唔知,不過係日本收視唔錯。

無記錯J2轉播賽馬2018年完,Viu TV接手機會唔細,收費台個邊有條頻道直播賽馬,仲有Viu TV Six長期要播放大量英文節目,但收視差,難有廣告收入,轉播賽馬都係Viu TV Six播多,見Viu TV Six不斷增加大量體育節目,去吸引觀眾,證明英文節目難有收視,唔知遲下TVB明珠台會唔會仿傚Viu TV Six。

發表於 Posted on: 2017-10-04 17:18

吉成千奈美
帖數 Posts: 1720
回頂端 / Top
講真J2都回復翻2012年節目安排,<VS嵐>復播,差在日本寵物節目未有固定時段播出,日劇時段要增加都係星期六晚00:00-01:00個段,都係代替以往高清翡翠台日劇時段,仲有J2一至日晚播埋d馬會節目阻住晒d時間,如果無堆馬會節目,可以重新編排,包括將動漫時段撤出11:35-12:35,放去更夜時段播不過到時TVB又會唔會放咁多節目落免費台,話唔定又係重播。晨間劇時段自從2015年8月後就完結,如果J2取消直播賽馬,六日下午6:00-7:00又有得播返晨間劇。

另外Viu TV係長假下午播放單元推理日劇,安排幾好,星期一下午播<偵探少女有紗的事件簿>幾好睇,仿傚童話故事愛麗絲夢遊仙景殺人手法,連橫殺人中慢慢揭曉事情經過,得閒可以上Viu Apps重溫。明日下午播藤木直人主演的日劇<叡古教授之事件簿>。

發表於 Posted on: 2017-10-04 17:25

吉成千奈美
帖數 Posts: 1720
回頂端 / Top
吉成千奈美:

睇咗J2台星期六播<HELLO!刺蝟偵探>5,6,7,8集,而第四五集最過癮講幽靈,講英太非常好驚,又有蒼井優演河合節子係一個靈媒角色演出得好好更令套劇集唔會沉悶,好似第九集又有蒼井優再演出,而第八集講森田剛演木暮久作幫一個老年男人找尋一對仔女,而係背後有可悲故事,更為幫佢完事。由第四集開始都幾好睇,會追睇!

而<緊急救命3>已睇咗第八集,講返上幾集係講醫生同醫務人員要捨己救人同要好專業更做得好多野,就上兩集真係令人無奈又無助,有時醫生都唔係萬能真係無能為力....幾有追看性劇集!

而<寵物情人>仲未重溫翻睇,而奇妙電視有播日劇有反丁隆史同 東山紀之,但唔知星期幾播,最衰無重温,奇妙電視網頁唔齊全好唔掂仲未搞好!

發表於 Posted on: 2017-11-09 18:21

kolley
帖數 Posts: 7596
回頂端 / Top
回應:kolley

我都有追睇<HELLO!刺蝟偵探>,睇了咁多集真係最好睇第四五集幽靈,蒼井優演靈媒驅鬼真係好神似,其實這套劇質素幾飄忽,上兩集講查女朋友來歷個集真係麻麻,主要都係鋪五郎同蘭子的愛情線,上集黃色手帕其實幾感人,套劇係日本收視差正正係每集質素保持不一,加上角色上除了瑛太有發揮外,其餘角色戲份唔多,不過整體上都好睇。

<緊急救命3>其實幾好睇,劇情每集有反思,唔似一般醫療劇太多醫療部分情節影響其他部分,好似每集都有描寫人物之間有關係,之後都仲會發展,唔似一般醫療劇單元式,而<緊急救命3>有幾條支線,實習生點從中成長,知名鋼琴家點克服以後彈唔到鋼琴,藍澤自責,同新海關係轉差,緋山好似同廚師有段情。仲有兩集就大結局。

<寵物情人>這幾集開始有戲劇性發展,自從蓮實去韓國工幹,同巌谷疏遠,福島主動去韓國接近蓮實同住開始發展,武志其實幫巌谷拉近同蓮實之間關係,播多兩集就大結局。其實套劇中段幾拖,加上好多Kiss同上床戲份,如果濃縮返10集,劇情緊湊好睇d。

奇妙電視日劇時段同J2星期日晚日劇時段打正,所以你睇J2未睇唔到奇妙,奇妙宜家播緊<刑偵相棒>第14季,之後都係播朝日刑事劇。

另外J2係11月播完<HELLO!刺蝟偵探>同<緊急救命3>,之後緊貼日本播放<女醫神Doctor X5>同<陸王>,兩套都係日本高收視劇集,記得留意同追睇。

發表於 Posted on: 2017-11-11 18:14

吉成千奈美
帖數 Posts: 1720
回頂端 / Top
吉成千奈美:

剛剛睇晒<HELLO!刺蝟偵探>完畢,我就由第四五集開始覺得幾睇,得到唔係差但係日本又唔收得,可能唔啱個班師奶睇,有可能<HELLO!刺蝟偵探>係有D誇張,我認為係由漫畫改編係咁啦!又咁啱星期日又播完<緊急救命3>都幾好睇,而<緊急救命3>比較多講人性,可能講出做醫生同護士同醫護人員心聲,應該比較多人睇囉!

而今個星期六日都播新日劇,估唔到咁快播<女醫神Doctor X 5>到時準時11點追睇,而星期日係晚上10:35播<陸王>係日曜劇場,套劇集係講做鞋事業,會有好多年輕演員演出應該勵志劇集,唔知好唔好睇啦!

而<寵物情人>我仲未重溫好似無動力追睇,反而奇妙電視台日劇好想追睇,有反丁隆史演< 偵探相棒>已播緊,我有睇咗少少好似幾好睇,但同J2台星期六日劇打對台真無計,仲有 東山紀之<刑事7人>而係安排出年2018而播但唔知時間,而奇妙電視台我都‵有睇《煉狗術師》同<空間改造王>都幾好睇!但係奇妙電視好遲登出節目表,而且又無設重溫網頁,已經播咗一段時間好似好耐都唔整做個網頁好貴....?

發表於 Posted on: 2017-11-21 11:18

kolley
帖數 Posts: 7596
回頂端 / Top
回應:kolley

講真<HELLO!刺蝟偵探>唔多適合拍成劇集,有d故事情節太弱,況且套劇只係跟原著拍漫畫搞笑風格,無好好將本身薄弱情節改篇,第九集講受男友虐待幼稚園老師個故事草草收場,河合出場居然為幫手制伏幼稚園老師男友,成集差唔多去晒排演舞台劇度,重心放差晒,反而主線感情描寫好少,第十集尋寶解謎都ok,這套劇收視差正正係每集質素不一。

相對上<緊急救命3>係好睇,有大場面救災現場救人夠震撼之餘,仲有套劇穿插幾條支線,每集都有唔同發展,而人物角色之間有多少描寫,唔似一般日本醫療劇都係一個病人做單元咁公式,<緊急救命3>每集有唔同主題又連到個故事,尤其近年講人性醫療劇唔多,真係幾值得睇。

見J2係兩星期前係咁宣傳<陸王>,反而<女醫神Doctor X 5>上星期六先開始宣傳,照計<陸王>好睇d,睇宣傳片係有兩個年輕演員山崎賢人同竹內涼真演出,不過實際上主角唔係佢地兩個,套劇係<半澤直樹>製作班底,應該唔係勵志劇集,都係商戰復仇劇。其實TVB放<陸王>係J2星期日晚播,反而<女醫神Doctor X 5>放星期六播,收視差,連預告都好hea。

上星期個集<寵物情人>都仲未睇,套劇睇睇下都無咩心機,不過播埋今個星期六大結局,下星期播<黑色筆記本>,Viu TV同J2對打意味濃,兩個台用同一時段日劇對打認真夠睇頭。

奇妙電視播d日劇都係刑事推理劇,宜家播緊套<刑偵相棒>已經係14季,你無追睇之前個季點知劇情發展,仲要同J2星期日晚日劇時段打正,上星期日J2播<緊急救命3>遲了15分鐘,你先睇到少少,想睇唯有等凌晨重播先有得睇。我無你咁好彩收到奇妙,不過如果收到未用錄影機錄影。東山紀之<刑警7人>都係放<刑偵相棒>時段播,其實這段時間播堆日劇都係重播有線劇集台。

其實相比起重播<刑偵相棒>個類刑事劇,反而想重播有線劇集台今年播堆日劇多d,草彅剛套<謊言戰爭>,相葉雅紀套<貴族偵探>,仲有觀月亞里沙套<櫻子小姐的腳下埋著屍體>,卡士吸引好多,更有追看性。
奇妙電視堆自製節目真係吸引過Viu TV,Viu TV除了得<恐怖醫學>外,真係無咩節目好睇,奇妙搞埋大氣電波,Viu TV收視仲差。奇妙宜家得直播有得上網睇,其他節目未有重溫。

發表於 Posted on: 2017-11-22 21:10

吉成千奈美
帖數 Posts: 1720
回頂端 / Top
另外J2係12月大陸化,星期一至五晚每日播兩粒鐘大陸劇,都唔知日劇仲可以做得幾耐,Viu TV一唔播台劇,J2索性cut埋台劇檔,日劇唔係有Viu TV同奇妙有做,都唔知J2會唔會有,見去年J2成幾個月停播日劇就知咩情況,宜家TVB個大陸股東搞到J2不似人形,之前幫J5搞個大陸台,收視差就收檔,宜家見J2有收視就放堆大陸嘢落來,望佢一年收檔,只要堆廣告商唔係d大陸劇時段插廣告,話俾高層知要J2大陸化損失一定廣告。

發表於 Posted on: 2017-11-22 21:10

吉成千奈美
帖數 Posts: 1720
回頂端 / Top
吉成千奈美:

今個星期日係J2播<陸王>,應該好似係商戰復仇劇,到時未睇吓....而你話<女醫神Doctor X 5>係日本收視差,話知佢我幾鍾意睇呢類型醫療劇集,唔係咁鍾意太煽情劇情應該師奶比較喜歡...

講回Viu TV,Viu TV最近真係安排節目真係麻麻,好彩就快播完<寵物情人>接著播<黑色筆記本>唔知好唔好睇啦!至於奇妙電視安排節目都OK,最唔好就戚無網頁重温....奇妙電視重播返個D日劇都咁正...而家做電視台都係大陸化,香港市場都要固定先得,真係望佢哋唔播半年大陸劇無乜人睇!

J2而家睇佢哋兩間電視台播D乜劌到時先出招,最重要係有無廣告商。

發表於 Posted on: 2017-11-24 1:29

kolley
帖數 Posts: 7596
回頂端 / Top
回應:kolley

J2放星期日晚10:35首播<陸王>,明顯係今期J2重點劇集,周不時開J2都睇到有<陸王>預告,咁話晒<陸王>強d,有山崎賢人,竹內涼真兩位年輕演員演出,而講日本製造波鞋為背景題材日劇都算新鮮。

反而<女醫神Doctor X 5>卡士弱,得米倉涼子一個有人氣,其餘演員都唔係日劇常見演員,今輯唔知會唔會加入新演員,前兩日睇J2有米倉涼子幫TVB宣傳<女醫神Doctor X 5>預告片,其實今輯唔係編開<女醫神Doctor X>的中園美保做編劇,劇情質素有d擔心,好老實講最好睇的一四季都係出自中園美保。

講開今季兩套醫療劇就有<女醫神Doctor X 5>同<雙面醫生2>,女性觀眾一面倒支持較煽情的<雙面醫生2>,男性觀眾比較支持<女醫神Doctor X 5>,好老實講今年J2播咁多醫療劇,<緊急救命3>偏離以往日本醫療劇作風,採多線發展,真係算幾特別,仲有卡士都豪華,好吸引人睇。

Viu TV今年都染了紅,開始播大陸綜藝同大陸劇,不過放埋d垃圾時間播無人理咁解,Viu TV今年得一段日劇時間,得套<Crisis>係好睇同有卡士,同以前一星期四套半日劇差天共地,<黑色筆記本>係日本收視唔錯,係推理日劇,唔知適唔適合你口味。

相對上奇妙電視安排節目似翻正常電視台,其實Viu TV係星期六晚播日劇時間太早,想睇都未必睇到,奇妙比較切合觀眾需要,有線近排都買唔少日劇,唯獨無買大陸劇,做電視台大陸化都係有大陸股東背景,忽視本地觀眾市場,最後未搞到做唔住。

宜家J2播大陸劇,就算無人睇都唔緊要,只要大陸老細鍾意,唔理有無廣告商都照播,Viu TV,奇妙電視點做都威脅唔到TVB,因為一台獨大,慣性收視,TVB播垃圾都有人睇,咁的大環境下好難影響TVB決策。

發表於 Posted on: 2017-11-24 18:27

吉成千奈美
帖數 Posts: 1720
回頂端 / Top
吉成千奈美:

係J2台星期六日都睇咗三集,而<女醫神Doctor X 5>我一樣咁鍾意睇,今輯好似東帝醫院上層好想查大門背景,呢三集都係講大門點樣做手術都係講一定唔會失敗,我就諗起香港大醫生(吳國際)可以同病人開咗刀三個鐘頭又走去第二間醫院,同另一個病人做手術真係仲勁過大門醫生世上好神奇真係有,,,,

另一套星期日<陸王>又幾好睇,最精彩係第二集已經有張力感到第三集劇情覺得好感動,下一集要追睇!會幾時播<雙面醫生2>我都會睇!

而Viu TV星期六播<黑色筆記本>我睇咗一集仲未知劇情係點,而我仲未睇第二集,至於奇妙電視就覺得好睇過Viu TV,奇妙電視比較多野睇,而家做電視多少都會小小染紅,我哋未揀選自己鍾意睇節目嚟睇囉!

發表於 Posted on: 2017-12-11 18:46

kolley
帖數 Posts: 7596
回頂端 / Top
回應:kolley

J2播緊兩套日劇<女醫神Doctor X 5>同<陸王>都有追睇,兩套日劇鍾意睇<陸王>多d,<陸王>劇情勵志,加上劇情連貫性強,好想追睇下集,好想知陸王會唔會研發成功,茂木可唔可以克服傷患再跑翻馬拉松,昨晚個集講大地唔信飯山會研發到適合硬度蠶絲膠鞋底,正正係飯山努力不斷終於開發成功,好感動。

反而<女醫神Doctor X 5>劇情真係麻麻,差過上一輯好多,頭兩集出現的新人物結果草草收場,本來期待之後仲有發展,好似第一集的清廉女院長結果婚外情俾人推落台,第二集傑出新人醫生受大門感動唔做醫生,第三集講第二觸診,病人對病有懷疑可以問第二醫生意見,好似單元式醫療劇,劇情無連貫。

好老實講<緊急救命3>好睇過<女醫神Doctor X 5>好多,起碼每集有唔同主題同發展,演員卡士都有人氣,唔會好似<女醫神Doctor X 5>每集都相同人物劇情咁悶,上一輯都仲有美國同中國取景,吸納外國遊客,今輯醫療鬥爭部分弱到爆,新加入角色可有可無,下一輯真係搵翻原作者中園美保寫劇本好過。

Viu TV播放日劇<黑色筆記本>幾好睇,睇了兩集劇情幾緊湊,係我心目中好睇過一式一樣的<女醫神Doctor X 5>,第一集講女主角原口原子俾銀行屈食死貓,她睇到銀行用假名做戶口,之後將筆錢轉入自己帳戶,欺騙了一大筆錢,係銀座開陪酒,原口原子本身欠下一身債,之後利用以前俾人陷害手段去搵一大筆錢,而她借用之前銀行假名接近達官貴人,係一個類似<守財奴>以錢為題材日劇,下集預告原口原子俾人暗殺,真係值得追,不過下星期停播。

Viu TV係聖誕假期有多套日劇播,12月24日平安夜晚8:30-10:30播放SP日劇<我想自己無法遇上命運般的戀愛>,由多部未華子主演,12月26日同30日下午都有兩套SP日劇播,<黑色福音>同<東京傷感故事 – 特別篇>。反而奇妙聖誕節無咩特別安排,數電視台染紅要最勁未TVB,睇下連J2都要播垃圾大陸劇。

發表於 Posted on: 2017-12-11 21:19

吉成千奈美
帖數 Posts: 1720
回頂端 / Top