tvb.com

 
 
tvb.com
 

經典回顧:天龍八部1997

經典回味:天龍八部1997

今日係天龍八部1997播出20週年,好鐘意呢套經典之一,改編自金庸作品嘅劇集。
根據維基百科記載,20年前嘅7月28日,為天龍八部於1997年首播時段。真假又好,天龍八部1997始終足有20年週年。大部份嘅選角加上服裝師搭配嘅造型非常經典,猶如金庸筆下走出來嘅角色,演員嘅演繹,動聽嘅主題曲及配樂,加上編劇完整交待故事情節,雖然部份劇情為虛構,總算改得合理,亦有部份劇情改得牽強,仲有部份情節過份誇張,如掃地僧嘅眼神可以殺死慕容博同蕭遠山。主題曲開頭天龍八部八大神像逐一出現,由周華健主唱嘅<難念的經>非常好聽,黃日華等人飾演嘅要角亦逐一出現,似乎每個主要人物角色代表不同性格嘅八部神。雖然選角認真,但係有部份藝員時有時無嘅演技不敢恭維,亦有部份藝員雖然同金庸筆下角色有一段距離,但勝在演技精湛,算為彌補自身不足嘅優勢。黃日華同李若彤分飾角色好奇怪,當兩個角色一齊出現,感覺好似對住塊鏡講對白咁,分飾角色嘅配音,蕭遠山嘅配音唔夠霸氣,反而李清蘿嘅配音同李若彤把聲相似。
配樂動聽係睇得更投入原因之一,陳浩民飾演嘅段譽單戀李若彤飾演嘅王語嫣,段譽第一眼凝望神仙姐姐嘅神像時候,已經愛上咗個神像,仲講咗一番有想侵犯佢,又當佢女神咁拜嘅說話,呢段對白加上配樂配合得非常好!
論畫面拍得最靚,莫過於黃日華飾演嘅喬峰埋葬阿朱一幕,用手劈開粗如木柴嘅竹,喬峰用自己嘅血寫上愛妻阿朱之墓嘅時候,悲痛嘅眼神,加上慘情配樂帶出淒美和完美效果!
雖然南慕容慕容復係威震江湖嘅高手,劇中依然唔夠段正明段正淳及黃眉僧集合三人之力,居然需要倚靠喬峰出手相救;雖然聚賢莊一役,喬峰所殺嘅武林人士眾多,但係死屍無個;雖然掃地僧可以用眼神殺死慕容博同蕭遠山;雖然喬峰唔騎馬唔帶18契丹武士,而係獨自一人出現於少室山;雖然慕容復於樹林中自刎,虛竹第二日受杖責,之後蕭遠山先出現當眾揭發葉二娘同帶頭大哥嘅奸情;雖然……
無嘢係100%完美,劇集點都有暇疵,整體嚟講,咁多版本天龍八部1997係拍得最有感情嘅一套同埋好經典。天龍八部1997臺前嘅藝員,幕後嘅團隊,生日快樂!加油!永遠支持你哋呢套天龍八部1997!Happy Birthday!

發表於 Posted on: 2017-07-28 0:47

林永
帖數 Posts: 152
回頂端 / Top